கோயில் வழிபடும் முறை

1.சிவாலய வழிபாட்டிற்கு எவ்விதம் செல்ல வேண்டும் ?

குளித்து , ‘சிவாய நம ‘ என்று தீருநீறு அணிந்து அர்ச்சனைப்பொருள்களையும், தூபதீபத்திற்குரிய பொருள்களையும் இயன்றவகையில் எடுத்துக்கொண்டு கோயில்களுக்கு செல்லவேண்டும்.  

2.கோயிலை அடைந்ததும் செய்ய வேண்டியது என்ன ?

கோயிலை அடைந்ததும் காலணிகளை வெளியில் விட்டு இராஐகோபுரத்தை தூல்லிங்கமாகக் கருதி ‘சிவ சிவ’ என கூறி வணங்கவேண்டும் .





3.கோயிலில் முதலில் என்ன செய்ய வேண்டும் ?

கோயிலின் முதற்கண் கொடிமர விநாயகர் உள்ளார் .அவர்திருமுன் ஆண்களாயின் எட்டுஅவைய வணக்கம் (அட்டாங்க நமஸ்காரமும்) பெண்களாயின் ஐந்துஅவைய வணக்கம் (பஞ்சாங்க நமஸ்காரமும்) செய்ய வேண்டும்.

4. ஐந்துஅவைய வணக்கம் (பஞ்சாங்க நமஸ்காரம்) என்றால் என்ன ?

தலை , இருகைகள் , முழந்தாள்கள் என்றும் ஐந்து உறுப்புகளும் நிலத்தில் தோய வணங்குதல் .

5. எட்டுஅவைய வணக்கம் (அட்டாங்க நமஸ்காரமும்) என்றால் என்ன ?

தலை, கைஇரண்டு, செவிஇரண்டு , மோவாய் ,புயங்கள் இரண்டு என்னும் எட்டு உறுப்புகளும் நிலத்தில் பொருந்துமாறு வணங்குதல் .

6.எந்ததிசை நோக்கி வணங்குதல் வேண்டும் ?

கிழக்கு-மேற்கு நோக்கிய சந்நிதிகளாயின் வடக்கே தலைவைத்தும் , தெற்கு – வடக்கு நோக்கிய சந்நிதிகளாயின் கிழக்கே தலை வைத்தும் வணங்குதல் வேண்டும் .

7. எத்தனை முறை வணக்கம் செய்தல் வேண்டும் ?

மூன்று , ஐந்து ,ஏழ, ஒன்பது முறை வணங்குதல் வேண்டும் . கோயிலில் இவ்விடத்தைத் தவிர வேறு எந்தப்பகுதியிலும் கீழே விழந்துவணக்கம் செய்தல் கூடாது .

8. விநாயகரை எவ்விதம் வணங்குதல் வேண்டும் ?

வணக்கம் செய்து எழந்தபின் இருகைகளாலும் தலையில் குட்டிக்கொண்டு, தோப்புக்கரணம் போட்டு வணங்கவேண்டும், பினகொடிமரத்தை அண்ணாந்துநோக்கி ‘ அரகரசிவசிவ’ என்று வணங்குதல் வேண்டும் .

9.அடுத்து செய்ய வேண்டியது என்ன ?

கொடிமரத்தை அடுத்துள்ள பலிபீடத்தில் நம்முடைய பாவ வினைகளை பலியிட்டதாக கருதி வணங்கிய பின் நந்திதேவரை வணங்கி பின்னர் நால்வர் பெருமக்களைப் போற்றி துதித்து, அடுத்து அடல்அரசரை (நடராசர்) வழிபட்டு கருவறை முன் செல்ல வேண்டும் .

10. கருவறை முன் செய்யும் வழிபாடு யாது?

ஒவ்வொரு சந்நிதிமுன்பும் ஏற்றதுதி பாடல்களை பாடி வழிபடுவது சிறந்து . கருவறையிலுள்ள அருவுருவ வடிவமான சிவனை திருமுறைகளை பாடி வழிபடுவது சிறந்தது . பின் அர்ச்சனைகள் செய்து , தீபதூபங்கள் காட்டி வழிப்படவேண்டும் . பின் உமையம்மையை வணங்குதல் வேண்டும் .

11.தென்முகக் கடவுளை வழிப்படும் முறை என்ன ?

தென்முகக் கடவுளை பாடிபரவி ,தீக்கை பெற்றவர்களாயின் அச்சன்னிதின் முன் அமர்ந்து ஒருமையுடன் திருவைந்தெழத்தை நூற்றுஎட்டு முறை செபித்தல் வேண்டும்.

12.அடுத்து வணங்கவேண்டிய சன்னிதிகள் என்ன ?

அடுத்து அறுபத்து மூவரை வழிப்பட்டு பின் தலவிநாயகர் , முருகன் , திருமால் , திருமகள் ,கலைமகள் ,துர்க்கை , நவக்கிரங்கள் ,சன்டிகேசுவரரை, வணங்கி இறுதியில் பைரவரை வணங்கிவழிபாட்டின் நிறைவாக கொடிமரச்சன்னதியை அடைந்து கீழே விழந்து வணங்கி ராஐகோபுரத்தின் கீழ் அமர்ந்து சிவனருளை சிந்தித்து தியானம் செய்து அதிகாரநந்தியிடம் விடை பெற்றுச் சிவசிந்தனையுடன் இல்லம் திரும்புதல் வேண்டும் .


கோயில் வலம் வரும் முறை

13.சிவன் கோவிலில் எத்தனை முறை வலம் வருதல் வேண்டும் ?

சிவன் கோவிலில் மூன்று , ஐந்து , ஏழ முதலான முறைகளில்வலம் வருதல் வேண்டும் . அவ்வாறு வலம் வரும் போது நந்திக்கு குறுக்கே செல்லுத கூடாது .

14. கோயில்களில் செய்ய கூடாதவைகள் யாவை ?

1.கோயில்களுக்கு நீராடாமல் செல்வதோ ,நீராடிய பின் ஈர ஆடையுடன் செல்வதோ கூடாது .

2.மூலஸ்தானத்தில் மூர்த்திக்கு அபிசேகம் , நைவேத்தியம் முதலியவை நடக்கும்போது சுவாமிதரிசனம் செய்தல், வலம் வருதல் முதலியன தவிர்த்தல் வேண்டும் .

3.கோயிலில் கிழக்கிலும் , வடக்கிலும் கால்களை நீட்டி நமஸ்காரம் செய்வது கூடாது .

4.நடந்து கொண்டும் , கிடந்து கொண்டும் விபூதிதரித்தல் கூடாது.

5.தீட்டுடன் போதல் ,கோபுர நிழலை மிதித்தல், புகைத்தல், தாம்பூலம் அணிந்து செல்லல்,செருப்பிணிந்து போதல், அசுத்தம் செய்தல் , சிரித்து விளையாடல் , வீண்மொழிபேசுதல் , தூங்குதல் கூடாது .

6.அன்னியர் யாவரேயாயினும் கோயிலுக்குள் வணங்குதல் கூடாது .

யாதொரு தெய்வம் கொண்டீர் ,அத்தெய்வம் ஆகி ஆங்கே

மாதொரு பாகனார் தாம் வருவர் மற்று அத்தெய்வங்கள்

வேதனைப்படும், இறக்கும், மேல்வினையும் செய்யும்

ஆதலான் ,இவை இலாதான் அறிந்து அருள் செய்வன் அன்றே.

தொகுக்க உதவிய நூல்கள் : சைவ சமயக்கலைக்களஞ்சியம் - முனைவர் சிவ. திருச்சிற்றம்பலம்